6 Abril 2021

Informe de entregas e prezos do leite en Galicia e España en febreiro de 2021

Nos dous primeiros meses do ano 2021, as entregas de leite á industria diminuíron en España en 7.366 t (-0,61%), mentres que aumentaron en Galicia en 7.512 t (1,62%). O prezo medio pagado polo leite en Galicia situouse en 32,7 c/L, mentres que en España foi de 33,8 c/L.

Galicia lidera as entregas de leite en España no mes de febreiro con 228.118 t, representando un 39,40% das entregas en España (579.015 t). En comparación a febreiro de 2020 (produción corrixida a 28 días), as entregas continúan medrando en Galicia, +4.292 t (1,92%), mentres que se estancan no total nacional, +15 t (0,01%), debido á caída da produción no resto de comunidades autónomas, -4.261 t (-1,20%).
Se analizamos o período xaneiro-febreiro 2021 fronte a xaneiro-febreiro 2020, no conxunto de España as entregas diminúen en 7.366 t (-0,61%). Porén, en Galicia aumentan en 7.512 t (1,62%), mentres que Cataluña e Castela e León é onde máis descende a produción, con -4.413 t (-3,47%) e -3.461 t (-2,28%), respectivamente, sendo estas dúas comunidades das maiores produtoras de leite de vaca de España (Castela e León a segunda e Cataluña a terceira) no ano 2020.
As calidades do leite en España, tanto graxa (3,77%) como proteína (3,32%), comezan a súa baixada estacional, diminuíndo o seu valor medio con respecto ao mes previo un 2,58% a graxa e un 1,48% a proteína. Con todo, son superiores aos valores rexistrados no mesmo mes de 2020, o 1,07% a graxa e o 0,91% a proteína. O diferencial de Galicia co resto de comunidades no valor da graxa continúa a ser amplo (3,85% vs. 3,72%), con valores semellantes no dato da proteína (3,33% vs. 3,31%).
O prezo medio pagado polo leite en Galicia, en febreiro de 2021, situouse en 32,7 c/L, un descenso de -0,3 c/L (-0,91%) en relación ao mes anterior, mentres que en España situouse en 33,8 c/L (-0,58%). No entanto, o prezo medio pagado aos produtores aumentou en Galicia nun 0,93% (0,3 c/L) con respecto ao mesmo mes do ano pasado, mentres que en España fíxoo nun 0,60% (0,2 c/L).
A estandarización do leite en España (4,0% de graxa e 3,3% de proteína) continúa amosando un diferencial de prezos máis grande entre Galicia e o resto de comunidades autónomas que o que se observa unicamente co prezo real. A media estatal é de 34,7 c/L, que aumenta ata 35,7 c/L se non se ten en conta a produción de Galicia, onde se sitúa o prezo en 33,2 c/L.
Os prezos de febreiro expresados en c/kg (32,82 en España e 31,75 en Galicia) son un 6,17% e un 9,24% inferiores, respectivamente, ao prezo medio ponderado da UE-27 (todos sen estandarizar), que se situou en 34,98 c/quilo (-0,18% respecto a xaneiro e -0,62% respecto a febreiro de 2020).

Descargas

Informe de entregas e prezos do leite en Galicia e España en febreiro 2021

Newsletter