5 Setembro 2022

Informe de entregas e prezos do leite en Galicia e España en xullo de 2022

Rexístrase unha diminución da produción destacable en Galicia (-3,08% respecto ao mesmo mes de 2021), seguindo a tendencia da produción nacional e europea. No canto do prezo, situouse en 44,7 c/L, un incremento de 1,6 c/L (3,71%) en relación a xuño.

Galicia lidera as entregas de leite en España no mes de xullo con 249.597 t, representando un 41,20% das entregas españolas (605.842 t). En Galicia caeu a produción respecto a xullo de 2021 un 3,08% (-7.935 t), mentres que no total de España reduciuse nun 4,41% (-27.965 t), cunha caída no resto de comunidades que superou o 5% (-5,32%, -20.030 t).
Se analizamos o período xaneiro-xullo 2022 fronte a xaneiro-xullo 2021, no conxunto de España as entregas diminúen en 59.014 t (-1,34%). A pesar das caídas rexistradas, en Galicia a produción acumulada aínda é superior á do 2021, con +8.014 t (0,46%). Entre o resto de comunidades, segue sendo destacable a importante redución da produción en Asturias (-17.031 t, -5,04%) e Cantabria (-16.199 t, -6,22%), únicas rexións cunha produción importante que superan o -5% de baixada.
As calidades do leite en España continúan coa baixada estacional que teñen no verán, situándose en valores semellantes aos de 2021 (3,62% de graxa e 3,23% de proteína). O diferencial de Galicia co resto de comunidades no valor da graxa continúa a ser amplo (3,71% vs. 3,56%), con valores máis similares no dato da proteína (3,24% vs. 3,22%).
O prezo medio pagado polo leite en Galicia, en xullo de 2022, situouse en 44,7 c/L, un incremento de 1,6 c/L (3,71%) en relación ao mes anterior, mentres que en España chegou aos 46,3 c/L, grazas a unha subida de 2,5 c/L (5,71%). Respecto ao mesmo mes do ano pasado, o prezo medio pagado aos produtores subiu en Galicia un 37,54% (+12,2 c/L), mentres que en España fíxoo un 38,62% (+12,9 c/L). A diferenza entre o prezo medio pagado no Estado e en Galicia é de 1,6 c/L, cifra que ascendería a 2,6 c/L comparando o pagado en Galicia co prezo medio ponderado do resto de comunidades autónomas (47,3 c/L).
A estandarización do leite en España (4,0% de graxa e 3,3% de proteína) continúa amosando un diferencial de prezos máis grande entre Galicia e o resto de comunidades autónomas que o que se observa unicamente co prezo real. A media estatal estandarizada é de 48,8 c/L, que aumenta ata 50,3 c/L se non se ten en conta a produción de Galicia, onde se sitúa o prezo en 46,6 c/L.
Os prezos de xullo expresados en c/kg (44,95 en España e 43,40 en Galicia) son un 12,00% e un 15,04% inferiores, respectivamente, ao prezo medio ponderado da UE-27 (todos sen estandarizar), que se situou en 51,08 c/kg (+3,40% respecto a xuño e +41,93% respecto a xullo de 2021).
As entregas de leite ecolóxico en España ascenderon no mes de xullo a 4.223 t (0,70% das entregas totais), cun prezo medio de 52,3 c/L. Destas, 2.119 t foron de produtores galegos (50,2% sobre o total nacional), representando o 0,85% das entregas totais de Galicia. O prezo medio pagado en Galicia situouse en 47,4 c/L.

Descargas

Informe de entregas e prezos do leite en Galicia e España en xullo 2022

Newsletter