8 Setembro 2021

Informe de entregas e prezos do leite en Galicia e España en xullo de 2021

As entregas en Galicia aumentan con respecto ao mesmo mes do ano pasado un 4,15% (10.251 t), mentres que no resto de comunidades o incremento é do 1,59% (5.894 t). O prezo medio pagado aos produtores aumentou en Galicia con respecto ao mesmo mes do ano pasado nun 2,20% (+0,7 c/L), mentres que en España fíxoo nun 2,77% (+0,9 c/L).

Galicia lidera as entregas de leite en España no mes de xullo con 257.523 t, representando un 41,2% das entregas nacionais (633.807 t). Estas aumentan en Galicia con respecto ao mesmo mes do ano pasado un 4,15% (+10.251 t), un incremento maior ao rexistrado no resto de comunidades autónomas (+1,59%, +5.894 t).
Se analizamos o período xaneiro-xullo 2021 fronte a xaneiro- xullo 2020, no conxunto de España as entregas aumentan en 30.418 t (+0,70%). Isto está baseado no incremento da produción das granxas galegas, con 47.738 t (+2,80%) máis que nos 7 primeiros meses de 2020. No lado oposto, hai 11 comunidades cunha produción menor neste período, entre as que destaca Cataluña, con 9.695 t menos (-2,09%).
As calidades do leite en España estabilízanse respecto a xuño, situándose nun 3,63% a graxa e no 3,25% a proteína. En canto ás calidades do leite de Galicia, a graxa (3,70%) diminúe respecto a xuño (3,73%) e a xullo de 2020 (3,72%), mentres que a proteína (3,27%) é igual a de xuño e superior á de xullo do 2020 (3,23%).
O prezo medio pagado polo leite en Galicia en xullo de 2021 situouse en 32,5 c/L, cifra similar ao mes anterior, mentres que en España situouse en 33,4 c/L, un incremento de 0,2 c/L (+0,60%). Respecto ao mesmo mes do ano pasado, o prezo medio pagado aos produtores aumentou en Galicia nun 2,20% (+0,7 c/L), mentres que en España fíxoo nun 2,77% (+0,9 c/L). A diferenza entre o prezo medio pagado no Estado e en Galicia é de 0,9 c/L, cifra que ascendería a 1,3 c/L comparando o pagado en Galicia co prezo medio ponderado do resto de comunidades autónomas (33,8 c/L).
A estandarización do leite en España (4,0% de graxa e 3,3% de proteína) continúa amosando un diferencial de prezos máis grande entre Galicia e o resto de comunidades autónomas que o que se observa unicamente co prezo real. A media estatal estandarizada é de 35,1 c/L, que aumenta ata 35,8 c/L se non se ten en conta a produción de Galicia, onde se sitúa o prezo en 33,8 c/L.
Os prezos de xullo expresados en c/kg (32,43 en España e 31,55 en Galicia) son un 9,31% e un 11,76% inferiores, respectivamente, ao prezo medio ponderado da UE-27 (todos sen estandarizar), que se situou en 35,76 c/quilo (-0,53% respecto a xuño e +8,90% respecto a xullo de 2020).
As entregas de leite ecolóxico en España ascenderon no mes de xullo a 4.237 t (0,67% do total de entregas), cun prezo medio de 47,3 c/L. Destas, 2.118 t foron de produtores galegos (50,0% sobre o total nacional), representando o 0,82% das entregas de Galicia. O prezo medio pagado en Galicia situouse en 46,5 c/L.

Descargas

Informe de entregas e prezos do leite en Galicia e España en xullo 2021

Newsletter