3 Decembro 2021

Informe de entregas e prezos do leite en Galicia e España en outubro de 2021

Galicia lidera as entregas de leite en España no mes de outubro con 247.546 t, representando o 41,6% das entregas españolas. No que se refire ao prezo medio pagado polo leite en Galicia en outubro de 2021, este situouse en 34,2 c/L, cun incremento de 0,9 c/L (2,70%) en relación ao mes anterior, mentres que en España aumentou en 1,1 c/L (3,22%), situándose en 35,3 c/L.

Galicia lidera as entregas de leite en España no mes de outubro con 247.546 t, representando un 41,64% das entregas nacionais (594.549 t). As entregas aumentan en Galicia, con respecto ao mesmo mes do ano pasado, un 4,48% (10.611 t), mentres que no resto de comunidades diminúen un -2,39% (-8.505 t), aumentando o total nacional un 0,36% (2.106 t).
Analizando o período xaneiro-outubro 2021 fronte a xaneiro-outubro 2020, no conxunto de España as entregas aumentan en 72.008 t (+1,17%). Este continúa a ser inferior á subida das entregas das explotacións lácteas galegas, 83.220 t (+3,45%), polo que no resto de comunidades a produción cae en -11.212 t (-0,30%) no que vai de 2021 respecto ao mesmo período de 2020.
As calidades do leite en España son similares a outubro de 2020, situándose nun 3,83% a graxa e no 3,36% a proteína. En canto ás diferenzas entre comunidades, o leite producido en Galicia segue mantendo valores superiores ao resto de comunidades (3,90% a graxa e 3,37% a proteína vs 3,78% e 3,35%).
O prezo medio pagado polo leite en Galicia en outubro de 2021 situouse en 34,2 c/L, un incremento de 0,9 c/L (2,70%) en relación ao mes anterior, mentres que en España aumentou 1,1 c/L (3,22%), ata os 35,3 c/L. Respecto ao mesmo mes do ano pasado, o prezo medio pagado aos produtores subiu en Galicia un 4,59% (+1,5 c/L), mentres que en España fíxoo un 4,75% (+1,6 c/L). A diferenza entre o prezo medio pagado no Estado e en Galicia é de 1,1 c/L, cifra que ascendería a 1,7 c/L comparando o pagado en Galicia co prezo medio ponderado do resto de comunidades autónomas (35,9 c/L).
A estandarización do leite en España (4,0% de graxa e 3,3% de proteína) continúa amosando un diferencial de prezos máis grande entre Galicia e o resto de comunidades autónomas que o que se observa unicamente co prezo real. A media estatal estandarizada é de 35,9 c/L, que aumenta ata 36,8 c/L se non se ten en conta a produción de Galicia, onde se sitúa o prezo en 34,4 c/L.
Os prezos de outubro expresados en c/kg (34,27 en España e 33,20 en Galicia) son un 9,81% e un 12,62% inferiores, respectivamente, ao prezo medio ponderado da UE-27 (todos sen estandarizar), que se situou en 38,00 c/kg (+1,60% respecto a setembro e +8,51% respecto a outubro de 2020).
As entregas de leite ecolóxico en España ascenderon no mes de outubro a 3.918 t (0,66% do total de entregas totais), cun prezo medio de 47,5 c/L. Destas, 1.928 t foron de produtores galegos (49,2% sobre o total nacional), representando o 0,78% das entregas totais de Galicia. O prezo medio pagado en Galicia situouse en 46,7 c/L.

Descargas

Informe de entregas e prezos do leite en Galicia e España en outubro 2021

Newsletter