5 Xaneiro 2022

Informe de entregas e prezos do leite en Galicia e España en novembro de 2021

As entregas en Galicia aumentan con respecto ao mesmo mes do ano pasado un 3,52% (8.142 t), mentres que no resto de comunidades baixan un 0,31% (-1.082 t). O prezo medio pagado aos produtores aumentou en Galicia con respecto ao mesmo mes do ano pasado nun 6,38% (+2,1 c/L, chegando aos 35 c/L), mentres que en España fíxoo nun 6,16% (+2,1 c/L, chegando aos 36,2 c/L).

Galicia lidera as entregas de leite en España no mes de novembro con 239.338 t, representando un 40,81% das entregas nacionais (586.519 t). En Galicia aumentan en comparación ao mesmo mes do ano pasado en 8.142 t (+3,52%), cifra que supera ás 7.060 t (1,22%) que aumentou en España, debido á baixada na produción do resto de comunidades autónomas (-1.082 t, -0,31%).
Analizando o período xaneiro-novembro 2021 fronte a xaneiro-novembro 2020, no conxunto de España as entregas aumentan en 79.067 t (+1,18%). Por comunidades, as entregas das explotacións lácteas galegas suben 91.361 t (+3,45%) no que vai de ano, baixando en -12.294 t (-0,30%) no resto de comunidades.
As calidades do leite en España seguen incrementándose respecto aos meses previos, como é habitual nestes meses. Comparando con novembro de 2020, destaca o incremento nas porcentaxes de graxa, pasando do 3,84% ao 3,92%.
O prezo medio pagado polo leite en Galicia en novembro de 2021 situouse en 35,0 c/L, un incremento de 0,8 c/L (2,34%) en relación ao mes anterior, mentres que en España aumentou 0,9 c/L (2,55%), ata os 36,2 c/L. Respecto ao mesmo mes do ano pasado, o prezo medio pagado aos produtores subiu en Galicia un 6,38% (+2,1 c/L), mentres que en España fíxoo un 6,16% (+2,1 c/L). A diferenza entre o prezo medio pagado no Estado e en Galicia é de 1,2 c/L, cifra que ascendería a 1,9 c/L comparando o pagado en Galicia co prezo medio ponderado do resto de comunidades autónomas (36,9 c/L).
A estandarización do leite en España (4,0% de graxa e 3,3% de proteína) continúa amosando un diferencial de prezos máis grande entre Galicia e o resto de comunidades autónomas que o que se observa unicamente co prezo real. A media estatal estandarizada é de 36,2 c/L, que aumenta ata 37,2 c/L se non se ten en conta a produción de Galicia, onde se sitúa o prezo en 34,8 c/L.
Os prezos de novembro expresados en c/kg (35,15 en España e 33,98 en Galicia) son un 12,17% e un 15,09% inferiores, respectivamente, ao prezo medio ponderado da UE-27 (todos sen estandarizar), que se situou en 40,02 c/kg (+3,46% respecto a outubro e +13,27% respecto a novembro de 2020).
As entregas de leite ecolóxico en España ascenderon no mes de novembro a 3.882 t (0,66% do total de entregas totais), cun prezo medio de 48,3 c/L. Destas, 1.936 t foron de produtores galegos (49,9% sobre o total nacional), representando o 0,81% das entregas totais de Galicia. O prezo medio pagado en Galicia situouse en 47,1 c/L.

Descargas

Informe de entregas e prezos do leite en Galicia e España en novembro 2021

Newsletter