6 Outubro 2020

Informe de entregas e prezos do leite en Galicia e España en agosto de 2020

Galicia lidera as entregas de leite en España no mes de agosto con 239.981 t, representando xa un 40,4% das entregas españolas (594.074 t). O prezo medio pagado aos produtores aumentou en Galicia nun 1,94% (+0,6 c/L) con respecto ao mesmo mes do ano pasado, mentres que en España fíxoo nun 0,62% (+0,2 c/L)

  • Galicia lidera as entregas de leite en España no mes de agosto con 239.981 t, representando un 40,4% das entregas españolas (594.074 t). As entregas en Galicia aumentan con respecto ao mesmo mes do ano pasado un 2,44% (5.710 t), mentres que no resto de comunidades descenden un 2,11% (-7.650 t), polo que as entregas totais de España (-0,33%) rompen unha tendencia de crecemento que duraba desde marzo de 2019.

  • Se analizamos o período xaneiro-agosto 2020 fronte a xaneiro-agosto 2019, no conxunto de España as entregas aumentan en 123.125 t (+2,54%). Destas, os produtores galegos aportan o 59,3%, cun incremento acumulado no ano 2020 de 72.984 t (+3,89% respecto da produción galega no mesmo período do ano 2019).

  • As calidades do leite en España cambian de tendencia, seguindo o comportamento habitual, mellorando ao final do verán e outono. Con respecto a agosto de 2020, a graxa aumenta debido ao incremento que ten no resto de comunidades (+1,22%), mentres que en Galicia descende levemente (-0,53%), aínda que Galicia segue cunhas calidades superiores (3,73% vs. 3,56%). A proteína non presenta variacións en España, incrementándose en Galicia (0,31%) e descendendo no resto de comunidades (-0,22%).

  • O prezo medio pagado polo leite en Galicia en agosto de 2020 situouse en 31,6 c/L, un descenso de 0,2 c/L (-0,63%) en relación ao mes anterior, mentres que en España situouse en 32,5 c/L, sen cambios respecto a xullo. Respecto ao mesmo mes do ano pasado, o prezo medio pagado aos produtores aumentou en Galicia nun 1,94% (+0,6 c/L), mentres que en España fíxoo nun 0,62% (+0,2 c/L).

  • A estandarización do leite en España (4,0% de graxa e 3,3% de proteína) continúa amosando un diferencial de prezos máis grande entre Galicia e o resto de comunidades autónomas que o que se observa unicamente co prezo real. A media estatal é de 34,2 c/L, que aumenta ata 35,1 c/L se non se ten en conta a produción de Galicia, onde se sitúa o prezo en 32,8 c/L. Este aumento da diferenza dos prezos está influenciado pola maior cantidade de graxa do leite galego.

  • Os prezos de agosto expresados en c/kg (31,55 en España e 30,68 en Galicia) son un 4,13% e un 6,78% inferiores, respectivamente, ao prezo medio ponderado da UE-27 (todos sen estandarizar), que se situou en 32,91 c/quilo (0,22% respecto a xullo e -3,07% respecto a agosto de 2019).

Newsletter

A través da nosa newsletter manterémolo informado das novas publicacións e eventos.