4 Xuño 2021

Informe de entregas e prezos do leite en Galicia e España en abril de 2021

As entregas de leite en Galicia aumentan con respecto ao mesmo mes do ano pasado un 2,75% (6.777 t). O aumento de entregas en España no período xaneiro-abril 2021 fronte a xaneiro-abril 2020 foi de 386 t (+0,02%), mentres que en Galicia foi de 20.866 t (2,17%). No canto do prezo, en Galicia situouse en 32,8 c/L en abril de 2021, un 1,23% superior ao do mesmo mes de 2020.

  • Galicia lidera as entregas de leite en España no mes de abril con 252.842 t, representando un 39,4% das entregas en España (641.675 t). En comparación a abril de 2020, as entregas continúan medrando en Galicia, +6.777 t (+2,75%), e en España, +5.593 t (+0,88%), aínda que a nivel nacional o aumento é inferior debido á lixeira caída da produción no resto de comunidades autónomas, -1.185 t (-0,30%).
  • Se analizamos o período xaneiro-abril 2021 fronte a xaneiro-abril 2020, no conxunto de España as entregas permanecen estables (+386 t, +0,02%). Con todo, entre comunidades existen grandes diferenzas, xa que Galicia aumentou a produción en 20.866 t (2,17%) nos catro primeiros meses do ano, mentres que doce comunidades diminuíron a súa produción, entre as que destacan Cataluña (-8.110 t, -3,03%) e Castela e León (-4.611 t, -1,47%).
  • As calidades do leite en España descenden respecto ao mes previo (-0,80% a graxa e -0,60% a proteína), pero son superiores a abril do ano pasado (0,27% a graxa e 0,61% a proteína).  En Galicia a evolución respecto a marzo foi similar, pero comparado cos datos de abril de 2020, a graxa diminuíu (3,79% vs. 3,82%) mentres que a proteína aumentou (3,33% vs. 3,30%).
  • O prezo medio pagado polo leite en Galicia, en abril de 2021, situouse en 32,8 c/L, un descenso de 0,1 c/L (-0,30%) en relación ao mes anterior, mentres que en España situouse en 33,6 c/L (-0,30%). Porén, o prezo medio pagado aos produtores aumentou en Galicia nun 1,23% (0,4 c/L) con respecto ao mesmo mes do ano pasado, mentres que en España comportouse de forma similar(+1,20%, 0,4 c/L). A diferenza entre o prezo medio pagado no Estado e en Galicia é de 0,8 c/L, cifra que ascendería a 1,2 c/L comparando o pagado en Galicia co prezo medio ponderado do resto de comunidades autónomas (34,0 c/L).
  • A estandarización do leite en España (4,0% de graxa e 3,3% de proteína) continúa amosando un diferencial de prezos máis grande entre Galicia e o resto de comunidades autónomas que o que se observa unicamente co prezo real. A media estatal estandarizada é de 34,8 c/L, que aumenta ata 35,5 c/L se non se ten en conta a produción de Galicia, onde se sitúa o prezo en 33,6 c/L.
  • Os prezos de abril expresados en c/kg (32,62 en España e 31,84 en Galicia) son un 7,09% e un 9,30% inferiores, respectivamente, ao prezo medio ponderado da UE-27 (todos sen estandarizar), que se situou en 35,11 c/quilo (+1,01% respecto a marzo e +4,71% respecto a abril de 2020).
  • As entregas de leite ecolóxico en España ascenderon no mes de abril a 4.455 t (0,69% do total de entregas), cun prezo medio de 47,9 c/L.  Destas, 2.346 t foron de produtores galegos (52,7% sobre o total nacional), representando o 0,93% das entregas de Galicia. O prezo medio pagado en Galicia situouse en 47,6 c/L.

Newsletter

A través da nosa newsletter manterémolo informado das novas publicacións e eventos.